Saoráil Faisnéise (FOI)
Is eagraíocht pháirtáirithe í Oifig an Choimisinéara Teanga faoin Acht um Shaoráil Faisnéise, 2014.
Deimhníonn an tAcht um Shaoráil Faisnéise cearta daoine den phobal teacht ar eolas oifigiúil an oiread agus is féidir i gcomhréir le leas an phobail agus cearta príobháideachais daoine eile.
Faoin Acht, tá sé de cheart ag aon duine iarratas a dhéanamh teacht ar fhaisnéis phoiblí nach bhfuil ar fáil don phobal ar aon slí eile. Deimhnítear san Acht:
- Ceart dlíthiúil a bheith ag gach duine rochtain a fháil ar fhaisnéis atá i seilbh comhlachta phoiblí.
- Ceart dlíthiúil a bheith ag gach duine teacht ar fhaisnéis oifigiúil atá i seilbh comhlachta phoiblí agus bhaineann leis féin nó léi féin.
- Ceart dlíthiúil a bheith ag gach duine faisnéis oifigiúil a bhaineann leis féin nó léi féin a fháil leasaithe más rud é go bhfuil sé neamhiomlán, míchruinn nó míthreorach.
- Ceart dlíthiúil a bheith ag gach duine teacht ar na cúiseanna a bhí le cinntí a rinne comhlacht poiblí agus a bhain leis féin nó léi féin.
Tá taifid áirithe i seilbh Oifig an Choimisinéara Teanga nach dtagann faoin Acht um Shaoráil Faisnéise. Baineann an taifid seo le príomhfheidhmeanna reachtúla an Choimisinéara faoi Alt 21 d’Acht na dTeangacha Oifigiúla, 2003:
- Taifid a bhaineann le himscrúduithe agus taifid a bhaineann le hiniúchtaí ar chomhlachtaí poiblí agus céimeanna eile a ghlactar chun géilliúlacht a dheimhniú.
- An fhaisnéis a fhaightear san Oifig i dtaca le comhairle a thabhairt do dhaoine den phobal maidir lena gcearta faoi Acht na dTeangacha Oifigiúla nó i dtaca le comhairle a thabhairt do chomhlachtaí poiblí maidir lena ndualgais reachtúla faoi Acht na dTeangacha Oifigiúla.
Tá taifid eile i seilbh na hOifige a thagann faoin Acht um Shaoráil Faisnéise. Ina measc siúd tá:
- Gach taifead a bhaineann le heolas pearsanta.
- Gach taifead eile a cruthaíodh tar éis 21 Aibreán 2008.
- Gach taifead eile is gá chun taifead reatha a thuiscint.
Tá eolas anseo maidir le hiarratas a dhéanamh faoin Acht um Shaoráil Faisnéise.
Scéim Foilseachán
Leagann an tAcht um Shaoráil Faisnéise, 2014 dualgas ar chomhlachtaí poiblí Scéim Foilseachán a fhoilsiú taobh istigh de shé mhí ón dáta ar tháinig Alt 8 den Acht i bhfeidhm. Cuirtear na cineálacha faisnéise seo a leanas ar fáil sa Scéim:
- Na cineálacha faisnéise a bhíonn á bhfoilsiú ag an Oifig nó a bhfuil rún aici iad a fhoilsiú.
- Cur síos ginearálta ar na taifid ar fad atá i seilbh na hOifige agus na téarmaí agus na coinníollacha faoina gcuirfear ar fáil iad gan chostas don phobal.
- Cur síos ginearálta ar struchtúr, eagrú, feidhmeanna agus cumhachtaí na hOifige, na seirbhísí a chuireann an Oifig ar fáil agus na nósanna imeachta a leantar.
Scéim Foilseachán Oifig an Choimisinéara Teanga
Foilsiú na nIarratas a Fhaightear
Foilsítear anseo taifead ar gach iarratas a fhaigheann Oifig an Choimisinéara Teanga faoin Acht um Shaoráil Faisnéise ar eolas neamhphearsanta ón 14 Aibreán 2015 ar aghaidh (an dáta ar tháinig an tAcht i bhfeidhm. Tabharfar táblaí na dtaifead seo cothrom le dáta go rialta.
Taifead ar na hIarratais a fuarthas faoin Acht um Shaoráil Faisnéise
Eolas Breise
Más mian leat iarratas a dhéanamh faoin Acht um Shaoráil Faisnéise nó má tá aon eolas breise ag teastáil uait faoi fheidhmiú an Achta in Oifig an Choimisinéara Teanga, tá fáilte romhat teagmháil a dhéanamh leis an Oifigeach Saorála Faisnéise, Nóirín Sheoige, agus beimid an-sásta cuidiú leat.
An tOifigeach Saorála Faisnéise
Oifig an Choimisinéara Teanga
An Spidéal
Gaillimh
Ríomhphost: saorailfaisneise@coimisineir.ie
Teileafón: 091-504006
Tá tuilleadh eolais i ndáil leis na hAchtanna um Shaoráil Faisnéise le fáil ar an suíomh gréasáin, www.foi.gov.ie, atá faoi chúram an Lár-Aonaid Polasaí sa Roinn Caiteachais Phoiblí agus Athchóirithe.